「十五十六」呢句廣東俗語，係指人嘅心情忐忑不安，心緒不寧嘅意思。

十五個香港專業攝影師，家鄉逢變，對未來生活有咗新嘅想法，大家都為應留抑或走、立即走定 係遲啲走、向東走還是向西走……各有盤算。

最後十五個家庭有咗十五種選擇，而且仲決定一齊完成第十六個感性嘅記錄，一齊喺依家處身之地用影像寫詩，成件事就用「隨街拍」嘅心思去反映我哋自己住緊嘅地方，或係有情感關聯嘅嘢、又或者有感性故事嘅國度。藉住相片反映現實情感！作為新住民或新心態渡過未來每一日。眼看手亦動之下，行出未來每一步；最後集結成一本視覺實體嘅書，書名就係《拾伍拾陸．拍你個街》。